𝗔𝘀𝗲𝗷𝗼, 𝗥𝗼𝘀𝗲𝘁𝗲, 𝗶𝗯𝗶𝗻𝗮𝗻𝗱𝗲𝗿𝗮 𝗮𝗻𝗴 𝗖𝗔𝗦𝗦 𝘀𝗮 𝗽𝗮𝗴𝘄𝗮𝘄𝗮𝗸𝗮𝘀 𝗻𝗴 𝗕𝘂𝘄𝗮𝗻 𝗻𝗴 𝗪𝗶𝗸𝗮 𝟮𝟬𝟮𝟰Nagpakitang gilas ang mga pambato ng Kolehiyo ng Sining at Agham Panlip

Ulat nina Ellyza Jane Gutierrez ay Antonio Joaquin Umali | Larawang kuha ni Josephine Marie Magday

Nagpakitang gilas ang mga pambato ng Kolehiyo ng Sining at Agham Panlipunan na sina Mandie Asejo at Nicole Gail Rosete sa mga patimpalak na idinaos para sa ikatlo at huling araw ng pagdiriwang ng Buwan ng Wika sa Engineering AVR ngayong ika-29 ng Agosto, 2024.

Itinanghal na kampeon si Asejo, Patnugot sa Komunikasyong Pangkaunlaran ng The Oracle, sa Spoken Poetry habang nag-uwi naman si Rosete ng ika-apat na gantimpala sa Pagkukwento—dalawa sa mga kompetisyong pinangasiwaan ng Tanggapan ng Kultura, Sining, at mga Wika ng TSU.

Malugod na ipinahayag ni Asejo ang kaniyang pasasalamat at kagalakan sa piyesang kaniyang ibinida at ibinahagi rin nito ang linyang nais niyang tumatak sa mga madla.

“Thankful naman ako kasi na-deliver ko ‘yung piece ko, although mayroon akong nakalimutan, pero nakapag-impromptu naman ako agad,” saad nito.

“’Yung linyang gusto kong tumatak sa mga nakaririnig ay…’yung inulit ko sa last. ‘Subalit ako’y naghintay, nagbantay sa iyong muling pagbabalik,’” dagdag niya.

Samantala, inilahad ni Rosete ang kaniyang pakiramdam nang tumapak ito sa entablado upang irepresenta ang kolehiyo, at ibinunyag na ito ang kanyang unang pagkakataong sumabak sa ganitong klase ng patimpalak.

“Noong nasa harap na ako, parang nablangko po ako. Forte ko po kasi ay spoken poetry… Siguro bago ako sumalang, i-practice ko siya nang i-practice sa harap ng tao,” ani Rosete.

Sa gabay ng CASS Cultural Director Daniel Dizon, matagumpay na naipamalas ng mga kandidato ang kanilang talento at kakahayan upang maisabuhay ang temang “Filipino, Wikang Mapagpalaya.”

Kabilang sa mga kawaksing Dekano at Dekana ay ang Associate Dean ng CASS, Dr. Raffy Aganon, Institutional Student Programs and Services Unit Head, Dr. Dexter Manzano, at Dr. Elizabeth Balanquit ng Kolehiyo ng Edukasyon.

Ang mga kandidatong nagwaging kampeon ay magiging kinatawan ng unibersidad sa nalalapit na panlalawigang patimpalak na Culture and the Arts Association of State Universities and Colleges in Region III (CAASUC III) 2024.